Organisašuvnnaide
Heaggadieđuid gieđahallan
Heaggadieđuid gieđahallan dárkkuha ovdamearkan heaggadieđuid čoaggima, seailluheami, geavaheami, sirdima ja luohpadeami. Heaggadieđuide guoski buot doaibmabijut heaggadieđuid gieđahallama plánemis gitta heaggadieđuid eret sihkkumii gehččojuvvojit heaggadieđuid gieđahallamin.
Heaggadieđut leat buot dieđut, mat laktásit olbmui, gii lea identifiserejuvvon, dehe gean sáhttá identifiseret. Heaggadieđut leat ovdamearkan namma, telefonnummir, báikedieđut ja áhkuid/ádjáid árbedávddaid guoski dieđut.
Registtardoalli lea olmmoš dehe organisašuvdna, mii meroštallá, man dárkkuhussii ja man láhkai heaggadieđut gieđahallojit. Registtardoalli sáhttá leat ovdamearkan searvi, mii čoaggá dieđuid lahtuin sihke buohcceviessu, mii gieđahallá buohcciid dieđuid ja maiddái neahttagávpi dehe sosiálalaš media bálvalus.
Heaggadieđuid gieđahalli lea olmmoš dehe organisašuvdna, mii gieđahallá heaggadieđuid registtardoalli beales. Heaggadieđuid gieđahalli sáhttá leat ovdamearkan márkanastindoaimmahat, mii dikšu nuppi fitnodaga márkanastima, dehe IT - bálvalanbuvttadeaddji, geas lea beassan registtardoalli heaggadieđuide.
Diehtosuodjeprinsihpat heaggadieđuid gieđahallamis
Heaggadieđuid gieđahallamis galgá čuovvut álot diehtosuodjeláhkaásaheamis dárkkuhuvvon diehtosuodjeprinsihpaid.
Diehtosuodjeprinsihpaid mielde heaggadieđuid galgá
- gieđahallat lága mielde, áššáigullevaččat ja registrerejuvvon olbmo dáfus rahpasit
- gieđahallat luhtolaččat ja dorvvolaččat
- čoaggit ja gieđahallat dihto, meroštallojuvvon ja lágalaš dárkkuhusa várás
- čoaggit dušše dárbbašlaš meari heaggadieđuid gieđahallama dárkkuhusa ektui
- beaivádit álot dárbbu mielde – eahpedárkilis ja boastto heaggadieđuid galgá sihkkut eret dehe njulget jođánit
- seailluhit hámis, mas registrerejuvvon olmmoš lea identifiseremis dušše nu guhká go lea dárbu dieđuidgieđahallama dárkkuhusaid ollašuhttima várás.
Diehtosuodjevuoigatvuođat
Go registtardoalli gieđahallá heaggadieđuid, dat galgá fuolahit registrerejuvvon olbmuid diehtosuodjevuoigatvuođaid ollašuhttimis. Dat galgá maiddái álkidahttit registrerejuvvon olbmo vuoigatvuođaid geavaheami.
Diehtosuodjeásahusa mielde registrerejuvvon olbmos lea vuoigatvuohta
- oažžut dieđuid iežas heaggadieđuid gieđahallamis
- oahpásmuvvat dieđuide
- njulget dieđuid
- váldit eret dieđuid ja boahtit vajáldahttot
- ráddjet dieđuid gieđahallama
- sirdit dieđuid vuogádagas nubbái
- vuostálastit dieđuid gieđahallama
- leat gárttakeahttá automáhtalaš mearrádusbargama vuollái.
Registrerejuvvon olmmoš ii sáhte geavahit buot vuoigatvuođaid buot oktavuođain. Dillái váikkuha ovdamearkan dat, mainna vuođustusain heaggadieđut gieđahallojit.
Diehtodorvoloavkideamit
Mii lea heaggadieđuid diehtodorvoloavkideapmi?
Heaggadieđuid diehtodorvoloavkidemiin dárkkuhuvvo dáhpáhus, man boađusin heaggadieđut duššet, jávket, rivdet, heaggadieđut luohpaduvvojit lobiheamet dehe daid beassá oaidnit oassebealli, geas ii leat gieđahallanvuoigatvuohta.
Diehtodorvoloavkideamis sáhttá čuovvut ovdamearkan heaggadieđuid bearráigeahččofámu massin, identitehtasuoládeapmi dehe beahtus, beaggima vaháguvvan dehe pseudonymaterejuvvon dehe juo čiegusindoallangeatnegasvuođa vuollásaš heaggadieđuid albmosii boahtin.
Dokumentere heaggadieđuid buot diehtodorvoloavkidemiid
Sihke registtardoalli ja heaggadieđuid gieđahalli galget suddjet heaggadieđuid nu, ahte suddjendoaibmabijut vástidit heaggadieđuid gieđahallamii laktáseaddji riskka. Dan lassin registtardoalli galgá ráhkkanit vejolaš diehtodorvoloavkidemiide nu, ahte ráhkada doaibmanrávvagiid diehtodorvoloavkidandiliid várás. Diehtodorvoloavkidemiide galgá bastit reageret nu jođánit go vejolaš.
Registtardoalli ferte árvvoštallat, man dássásaš riska diehtodorvoloavkideamis čuovvu olbmuide, geat leat dan vuollái gártan. Riskka dássi meroštallá daid doaibmabijuid, maidda registtardoalli galgá álgit.
Dokumentere heaggadieđuid buot diehtodorvoloavkidemiid ja maiddái daid váikkuhusaid ja ollašuhtton njulgendoaimmaid fuolakeahttá das, mat doaibmabijut diehtodorvoloavkideamis loahpaloahpas čuvvot. Dokumenterengeatnegasvuođa dehe almmuhusa bargama healbadeapmi leat diehtosuodjeásahusa vuostá. Dat sáhttá doalvut diehtosuodjeásahusas meroštallon čuovvumušaide.
Almmut diehtosuodjeáittardeaddji doaimmahahkii
Heaggadieđuid diehtodorvoloavkideamis galgá almmuhit bearráigeahččovirgeoapmahažžii, jos loavkideapmi sáhttá dagahit riskka lunddolaš olbmuid vuoigatvuođaide ja friijavuođaide. Suomas bearráigeahččovirgeoapmahažžan doaibmá diehtosuodjeáittardeaddji doaimmahat.
Heaggadieđuid diehtodorvoloavkideamis galgá almmuhit diehtosuodjeáittardeaddji doaimmahahkii almmá dárbbašmeahttun ájahallama haga ja vejolašvuođaid mielde 72 diimmu siste das, go registtardoalli lea boahtán diđolažžan diehtodorvoloavkideamis. Heaggadieđuid gieđahalli galgá almmuhit diehtodorvoloavkideamis vuos registtardoallái, jos ii leat sierra sohppon, ahte gieđahalli sáhttá almmuhit diehtodorvoloavkideamis njuolgga diehtosuodjeáittardeaddji doaimmahahkii. Vástu almmuhusa bargamis seailu goittotge registtardoallis.
Jos almmuhus ii dahkko 72 diimmu siste, registtardoalli galgá doaimmahit diehtosuodjeáittardeaddji doaimmahahkii vuođustallon čilgehusa.
Goas heaggadieđuid diehtodorvoloavkideamis almmuhuvvo registrerejuvvon olbmui?
Heaggadieđuid diehtodorvoloavkideamis galgá almmuhit registrerejuvvon olbmui, jos dat oalle sihkkarit dagaha alla dási riskka su vuoigatvuođaide ja friijavuođaide. Registtardoalli galgá dalle almmuhit áššis almmá dárbbašmeahttun ájahallama haga, vuoi registrerejuvvon olbmos lea vejolašvuohta suddjet áššiidis ovdamearkan giddemiin kredihttagoartta.
Bija almmuhussii dáid dieđuid:
- čielga govvádusa heaggadieđuid diehtodorvoloavkideamis
- diehtosuodjevástideaddji nama ja oktavuođadieđuid dehe eará oktavuođabáikki, gos sáhttá oažžut lassidieđuid
- heaggadieđuid diehtodorvoloavkideami jáhkehahtti čuovvumušaid
- doaibmabijuid, maid registtardoalli lea evttohan dehe maid dat lea jo ollašuhttán; dárbbu mielde maiddái doaibmabijuid vejolaš vahágiid geahpedeami várás.