Priváhtaolbmuide

Dovdda iežat diehtosuodjevuoigatvuođaid

EU:a almmolaš diehtosuodjeásahusas muitaluvvo, mat vuoigatvuođat dus leat, go juoga fitnodat dehe organisašuvdna gieđahallá du heaggadieđuid.

Dus lea vuoigatvuohta

  • oažžut dieđuid iežat heaggadieđuid gieđahallamis
  • oahpásmuvvat dieđuide
  • njulget dieđuid
  • váldit eret dieđuid ja boahtit vajáldahttot
  • ráddjet dieđuid gieđahallama
  • sirdit dieđuid vuogádagas nubbái
  • vuostálastit dieđuid gieđahallama
  • leat gárttatkeahttá automáhtalaš mearrádusbargama vuollái.

Buot vuoigatvuođaid ii sáhte geavahit buot oktavuođain. Dillái váikkuha ovdamearkan dat, mainna vuođustusain du heaggadieđut geavahuvvojit.

Mo mun sáhtán geavahit iežan diehtosuodjevuoigatvuođaid?

Váldde oktavuođa registtardoallái elege dan organisašuvdnii, mii gieđahallá du dieđuid. Muital bivdagis, man vuoigatvuođa don háliidat geavahit. Jos registtardoalli ii vástit du bivdagii mánotbaji áigemeari siste dehe dovddat, ahte du diehtosuodjevuoigatvuođat leat eará láhkai loavkiduvvon, sáhtát leat oktavuođas diehtosuodjeáittardeaddji doaimmahahkii.

Almmuhus diehtosuodjeáittardeaddjái

Go lea gažaldat du iežat vuoigatvuođain

Jos don háliidat geavahit iežat diehtosuodjevuoigatvuođaid, váldde álot vuos oktavuođa du heaggadieđuid gieđahalli fitnodahkii dehe organisašuvdnii elege registtardoallái.

Registtardoalli galgá vástidit du bivdagii almmá dárbbašmeahttun ájahallama haga ja maŋimustá ovtta mánotbaji siste. Jos registtardoalli ii áiggo čuovvut du bivdaga, dat galgá vástádusas vuođustallat biehttaleami.

Jos registtardoalli biehttala du bivdagis eaige biehttaleapmái leat du mielas vuođustusat, sáhtát váldit oktavuođa diehtosuodjeáittardeaddji doaimmahahkii. Diehtosuodjeáittardeaddji sáhttá muhtin dáhpáhusain mearridit, ahte registtardoalli ollašuhttá du bivdaga.

Go lea gažaldat eará váilevuođas heaggadieđuid gieđahallamis

Don sáhtát almmuhit diehtosuodjeáittardeaddjái, jos eahpidat, ahte juoga organisašuvdna dehe olmmoš gieđahallá heaggadieđuid diehtosuodjenjuolggadusaid vuostásaččat.

Váilevuohta sáhttá dárkkuhit ovdamearkan, ahte

  • heaggadieđuid gieđahallamii ii leat lágalaš vuođustus dehe
  • heaggadieđut gieđahallojit menddo viidát gieđahallama dárkkuhusa ektui.