Priivaatulmuid

Tuubdâ jieijâd tiätusyejivuoigâdvuođâid

EU almos tiätusyejiasâttâsâst muštâluvvoo, ete moh vuoigâdvuođâid tust láá, ko miinii irâttâsâid tâi ornijduumijd kieđâvuš tuu persovntiäđuid.

Tust lii vuoigâdvuotâ

  • finniđ tiäđuid tuu persovntiäđui kieđâvušmist
  • uápásmuđ tiäđoid
  • vuoigiđ tiäđuid
  • sikkođ tiäđuid já šoddâđ vájáldittum
  • raijiđ tiäđui kieđâvuššâm
  • sirdeđ tiäđuid vuáháduvâst nuubán
  • vuástálistiđ tiäđui kieđâvuššâm
  • leđe kartâhánnáá automaatlii miärádâstoohâm čuosâttâhhân.

Puoh vuoigâdvuođâid ij paste kevttiđ puoh tiilijn. Tilán vaaikut ovdâmerkkân tot, mon vuáđuld tuu persovntiäđuh kiävttojeh.

Maht mun puávtám kevttiđ muu tiätusyejivuoigâdvuođâid?

Vääldi ohtâvuođâ registertuállei ađai ton ornijdumán, mii kieđâvuš tuu tiäđuid. Muštâl táttumist, ete mon vuoigâdvuođâ tun halijdah kevttiđ. Jis registertuállee ij västid tuu táttumân mánuppaje meriääigi siste tâi tuu mielâst oro, ete tuu tiätusyejivuoigâdvuođah láá eresnáál luávkkájum, te tun puávtáh leđe ohtâvuođâst tiätusyejiváldálii toimâttâhân.

Almottâs tiätusyejiváldálâžân

Ko lii koččâmuš tuu jieijâd vuoigâdvuođâin

Jis tun halijdah kevttiđ jieijâd tiätusyejivuoigâdvuođâid, te vääldi ain vistig ohtâvuođâ tuu persovntiäđuid kieđâvuššee irâttâsân tâi ornijdumán ađai registertuállei.

Registertuállee kalga västidiđ tuu táttumân tušes ájáttâlhánnáá já majemustáá oovtâ mánuppaje siste. Jis registertuállee ij ááigu nuávdittiđ tuu táttum, te tot kalga jieijâs vástádâsâst agâstâllâđ piettâlem.

Jis registertuállee piettâl táttumist iäge piettâlmân lah tuu mielâst aagah, te tun puávtáh väldiđ ohtâvuođâ tiätusyejiváldálii toimâttâhân. Tiätusyejiváldálâš puáhtá motomijn tábáhtusâin meridiđ registertuállee olášuttiđ tuu táttum.

Ko lii koččâmuš eres vááijuvvuođâst persovntiäđui kieđâvušmist

Tun puávtáh almottiđ tiätusyejiváldálâžân, jis tun epidah, ete miinii ornijduumijd tâi ulmuid kieđâvuš persovntiäđuid tiätusyejinjuolgâdusâi vuástásávt.

Vááijuvvuotâ puáhtá tárguttiđ ovdâmerkkân, ete

  • persovntiäđui kieđâvušmân iä lah laavâmiäldásiih aagah tâi
  • persovntiäđuh kieđâvuššojeh liijkás vijđáht kieđâvuššâm ulme háárán.