Organisaatioid
Persoonteâđai ǩiõttʼtõõllmõš
Persoonteâđai ǩiõttʼtõõllmõš miârkkšââvv õuddmiârkkân persoonteâđai noorrmõõžž, seeiltummuž, âânnmõõžž, serddmõõžž da luõvtummuž. Puk persoonteâđaid kuõskteei toiʹmm persoonteâđai ǩiõttʼtõõllmõõžž plaanmõõžžâst persoonteâđai jaukkummša lie persoonteâđai ǩiõttʼtõõllmõš.
Persoonteâđ lie puk teâđ, kookk koʹlle tobdstum leʹbe tobdstemnalla åårrai ooumže. Persoonteâđ lie õuddmiârkkân nõmm, teʹlfoon-nââmar, sââʹjjteâđ da maaddârpuärrsi äʹrbbsaž puõʒlmid kuõskki teâđ.
Rekisteeʹrtuõʹllʼjeei lij ooumaž leʹbe organisaatio, kååʹtt meäʹrtââll, mõõnn ââʹnnma ja mõõn nalla persoonteâđaid ǩiõttʼtõõlât. Rekisteeʹrtuõʹllʼjeei vuäitt leeʹd õuddmiârkkân jiiʹjjez vuäzzlain teâđaid noorri õhttõs, puõcciteâđaid ǩiõttʼtõõlli puõccipõrtt, neʹttkaupp leʹbe sosiaalʼlaž media kääzzkõs.
Persoonteâđai ǩiõttʼtõõlli lij ooumaž leʹbe organisaatio, kååʹtt ǩiõttʼtââll persoonteâđaid rekisteeʹrtuõʹllʼjeei lokku. Persoonteâđai ǩiõttʼtõõlli vuäitt leeʹd õuddmiârkkân nuuʹbb põrggâz markknâsttmõõžž håiddai markknâʹsttemkoontâr leʹbe IT-kääzzkõstaʹrjjeei, kååʹtt peäss rekisteeʹrtuõʹllʼjeei persoonteâđaid.
Teâttsuõjjvuâđđjurddi persoonteâđai ǩiõttʼtõõllmõõžžâst
Persoonteâđai ǩiõttʼtõõllmõõžžâst âlgg jääʹǩǩted pâi teâttsuõjjlääʹjjšiõttummuž meâldlaž teâttsuõjjvuâđđjurddjid.
Teâttsuõjjvuâđđjurddji mieʹldd persoonteâđaid âlgg
- ǩiõttʼtõõllâd lääʹjjmeâldlânji, vueʹǩǩsânji da rekisterõsttum oummu peäʹlnn čõõđkuâsttjeeinalla
- ǩiõttʼtõõllâd naʹddjõõzzâst da staanlânji
- noorrâd da ǩiõttʼtõõllâd tiõttum, vuõiʹǧǧest äšša kuulli da lääǥǥlaž määin vääras
- noorrâd tåʹlǩ taarblaž meäʹr persoonteâđai ǩiõttʼtõõllmõõžž miârktõʹsse veʹrddeeʹl
- peeiʹvted pâi taarb mieʹldd ‒ panntääʹrǩes da vââǥǥlaž persoonteâđaid âlgg jaukkeed leʹbe vuõiǥeed mââʹjeekani
- seeilted häämast, koʹst rekisterõsttum ooumaž lij tobdstemnalla tåʹlǩ nuʹtt kuuʹǩǩ ko lij tarbb teâđai ǩiõttʼtõõllâm määin tieuʹddem vääras.
Teâttsuõjjvuõiggâdvuõđ
Ko rekisteeʹrtuõʹllʼjeei ǩiõttʼtââll persoonteâđaid, tõn âlgg ââʹnned huõl rekisterõsttum teâttsuõjjvuõiggâdvuõđi teâuddmõõžžâst. Tõn âlgg še hiâlpted rekisterõsttum oummu vuõiggâdvuõđi âânnmõõžž.
Teâttsuõjjasetõõzz mieʹldd rekisterõsttum oummust lij vuõiggâdvuõtt
• vuäǯǯad teâđ persoonteâđeez ǩiõttʼtõõllmõõžžâst
• vuäǯǯad tobdstõõttâd teâđaid
• vuõiǥeed teâđaid
• jaukkeed teâđaid da šõddâd väjldõttum
• rajjted teâđai ǩiõttʼtõõllmõõžž
• seʹrdded teâđaid riâšldõõǥǥâst nobba
• vuâsttlâʹstted teâđai ǩiõttʼtõõllmõõžž
• leeʹd jooudǩâni automaattlaž tuʹmmstõktuâj vuâlla.
Rekisterõsttum ooumaž ij vueiʹt ââʹnned pukid vuõiggâdvuõđid pukin vuõʹjjin. Vuâkka vaaikat õuddmiârkkân tõt, mõõnn vuâđald persoonteâđääd ǩiõttʼtõõlât.
Teâttstaan-neuʹrrummuž
Mii lij persoonteâđai teâttstaan-neuʹrrummuš?
Persoonteâđai teâttstaan-neuʹrrummšin juuʹrdet vueʹjj, koonn seuʹrrjõsân persoonteâđ tårmmje, läppje, mottje, persoonteâđaid luõvtet lååʹvtaa leʹbe tõid peäss vueʹsspieʹll, koʹst ij leäkku ǩiõttʼtõõllâmvuõiggâdvuõtt.
Teâttstaan-neuʹrrummšest vuäitt šõddâd õuddmiârkkân persoonteâđai vuåppâmpâstlvažvuõđ mõõntummuš, identiteʹttsuâlummuš leʹbe maannmõš, slääʹv tårmmjõõvvmõš leʹbe pseudonymisõsttum leʹbe peeitastââʹnnemõõlǥtõõzz vuâllsaž persoonteâđai päʹljsmõõvvmõš.
Dokumentââʹst puk persoonteâđai teâttstaan-neuʹrrummšid
Nuʹtt rekisteeʹrtuõʹllʼjeei ko persoonteâđai ǩiõttʼtõõlli âlgg suõjjeed persoonteâđaid nuʹtt, što suõjjeemtooiʹm vaʹsttee persoonteâđai ǩiõttʼtõõllma kuulli riisk. Lââʹssen rekisteeʹrtuõʹllʼjeei âlgg vaʹrrjõõttâd vueiʹtlvaž teâttstaan-neuʹrrummšid raajeeʹl toiʹmmjemvuäʹppõõzzid teâttstaan-neuʹrreemvueʹjji vääras. Teâttstaan-neuʹrrummšid âlgg pâʹstted reagâʹstted sõõrǥmõõzz mieʹldd.
Rekisteeʹrtuõʹllʼjeei âlgg ärvvtõõllâd, mõõnn tääʹzz riskk teâttstaan-neuʹrrummšest šâdd oummid koid tõt kuâskk. Riisk tääʹss meäʹrat tõid tooiʹmid, koid rekisteeʹrtuõʹllʼjeei âlgg äʹlǧǧed.
Dokumentââʹst puk persoonteâđai teâttstaan-neuʹrrummšid di tõi vaaiktõõzzid da šõddâm koʹrjjeei tooiʹmid huõlǩani tõʹst, mõõkk tooiʹm teâttstaan-neuʹrrummšest looppâst seuʹrrje. Dokumentâʹsttemõõlǥtõõzz leʹbe iʹlmmtõõzz raajjâm kuâđđmõš lij teâttsuõjjasetõõzz vuâsttsaž. Tõt vuäitt viikkâd teâttsuõjjasetõõzzâst meäʹrtum seuʹrrjummšid.
Iʹlmmet teâttsuõjjväʹlddneeʹǩǩ konttra 72 čiâss seʹst
Persoonteâđai teâttstaan-neuʹrrummšest âlgg iʹlmmted vuåppâmveʹrǧǧnekka, jos neuʹrrummšest vuäitt šõddâd riskk luândlaž oummui vuõiggâdvuõđid da väʹlddvuõđid. Lääʹddjânnmest vuåppâmveʹrǧǧneʹǩǩen toiʹmmai Teâttsuõjjväʹlddneeʹǩǩ koontâr.
Persoonteâđai teâttstaan-neuʹrrummšest âlgg iʹlmmted teâttsuõjjväʹlddneeʹǩǩ konttra määinteʹmes mââjõõzztaa da vueiʹttemvuõđi mieʹldd 72 čiâss seʹst tõʹst, ko rekisteeʹrtuõʹllʼjeei lij teâđstam teâttstaan-neuʹrrummuž. Persoonteâđai ǩiõttʼtõõlli âlgg iʹlmmted teâttstaan-neuʹrrummšest vuõʹššen rekisteeʹrtuõʹllʼjeeja, jos ij leäkku jeäʹrben suåppum, što ǩiõttʼtõõlli vuäitt iʹlmmted teâttstaan-neuʹrrummšin vuõiʹǧǧest teâttsuõjjväʹlddneeʹǩǩ konttra. Vaʹsttõsvuõtt iʹlmmtõõzz raajjmõõžžâst seill kuuitâǥ rekisteeʹrtuõʹllʼjeeʹjest.
Jos iʹlmmtõõzz jeäʹt rajju 72 čiâss seʹst, rekisteeʹrtuõʹllʼjeei âlgg tooiʹmted teâttsuõjjväʹlddneeʹǩǩ konttra vuâđđtõllum čiõlǥtõõzz.
Kuäʹss persoonteâđai teâttstaan-neuʹrrummšest iʹlmmtet rekisterõsttum ooumže?
Persoonteâđai teâttstaan-neuʹrrummšest âlgg iʹlmmted rekisterõsttum ooumže, jos tõt aaibšõõzz mieʹldd šõõddat õll riisk tän vuõiggâdvuõđid da väʹlddvuõđid. Rekisteeʹrtuõʹllʼjeei âlgg täʹl iʹlmmted ääʹššest määinteʹmes mââjõõzztaa, što rekisterõsttum oummust lij vueiʹttemvuõtt suõjjõõttâd õuddmiârkkân cõõggeeʹl kredittkoortâs âânnmõõžž.
Siiʹsǩââtt iʹlmmtõʹsse täid teâđaid:
- čiõlgg kovvõs persoonteâđai teâttstaan-neuʹrrummšest
- teâttstaanvaʹstteei nõmm da õhttvuõtt-teâđ leʹbe jeeʹres õhttvuõttpäiʹǩǩ, koʹst vuäitt vuäǯǯad lââʹssteâđ
- persoonteâđai teâttstaan-neuʹrrummuž aaibšum seuʹrrjõõzz
- tooiʹm, koid rekisteeʹrtuõʹllʼjeei lij eʹtǩǩääm leʹbe koid tõt lij juʹn tuejjääm; taarb mieʹldd še tooiʹm vueiʹtlvaž häittvaaiktõõzzi uuʹccummšen.