Privattooumže

Toobd teâttsuõjjvuõiggâdvuõđääd

EU almmjallaš teâttsuõjjasetõõzzâst vuäʹpstet, mõõkk vuõiggâdvuõđ tuʹst lie, ko kååʹtt-ne põõrǥâs leʹbe organisaatio ǩiõttʼtââll persoonteâđääd.

Tuʹst lij vuõiggâdvuõtt

  • vuäǯǯad teâđ persoonteâđääd ǩiõttʼtõõllmõõžžâst
  • tobdstõõttâd teâđaid
  • vuõiǥeed teâđaid
  • jaukkeed teâđaid da šõddâd väjldõttum
  • rajjted teâđai ǩiõttʼtõõllmõõžž
  • seʹrdded teâđaid riâšldõõǥǥâst nobba
  • vuâsttlâʹstted teâđai ǩiõttʼtõõllmõõžž
  • leeʹd jooudǩâni automaattlaž tuʹmmstõktuâj vuâlla.

Pukid vuõiggâdvuõđid ij vueiʹt ââʹnned pukin vuõʹjjin. Vuâkka vaaikat õuddmiârkkân tõt, mõõnn vuâđald persoonteâđääd ââʹnet.

Mõõnn nalla vuäitam ââʹnned teâttsuõjjvuõiggâdvuõđään?

Åår õhttvuõđâst rekistertuõʹllʼjeeja leʹbe tõn organisaatio årra, kååʹtt ǩiõttʼtââll teâđääd. Iʹlmmet raukkmõõžžâst, koonn vuõiggâdvuõđ haaʹlääk ââʹnned. Jos rekisteeʹrtuõʹllʼjeei ij vaʹstted tuu raukkmõʹšše määnpââʹj mieʹrrääiʹj seʹst leʹbe âânak, što teâttsuõjjvuõiggâdvuõđääd lij jeeʹresnalla neuʹrruum, vuäitak leeʹd õhttvuõđâst teâttsuõjjväʹlddneeʹǩǩ konttra.

Iʹlmmtõs teâttsuõjjväʹlddnekka

Ko lij kõõččmõš jiijjad vuõiggâdvuõđin

Jos haaʹlääk ââʹnned teâttsuõjjvuõiggâdvuõđääd, åår aainâs vuõʹššen õhttvuõđâst persoonteâđääd ǩiõttʼtõõlli põrggsa leʹbe organisaatio årra leʹbe rekistertuõʹllʼjeeja.

Rekisteeʹrtuõʹllʼjeei âlgg vaʹstteed tuu raukkmõʹšše määinteʹmes mââjõõzztaa da mââimõõzzâst õõut määnpââʹj seʹst. Jos rekisteeʹrtuõʹllʼjeei ij ääiǥ jääʹǩǩted tuu raukkmõõžž, rekisteeʹrtuõʹllʼjeei âlgg vaʹsttõõzzstes vuâđđõõllâd ǩeâlddõõttmõõžžâs.

Jos rekisteeʹrtuõʹllʼjeei ǩeâlddââtt raukkmõõžžstad ij-ka ǩeâlddõõttmõʹšše leäkku miõlstad vuâđđ, vuäitak väʹldded õhttvuõđ teâttsuõjjväʹlddneeʹǩǩ konttra. Teâttsuõjjväʹlddneǩ vuäitt måttmin aaʹššin mieʹrreed rekisteeʹrtuõʹllʼjeei jääʹǩǩted tuu raukkmõõžž.

Ko lij kõõččmõš jeeʹres pannääʹššest kuõskeeʹl persoonteâđai ǩiõttʼtõõllmõõžž

Vuäitak iʹlmmted teâttsuõjjväʹlddnekka, jos aaibšak, što kååʹtt-ne organisaatio leʹbe ooumaž ǩiõttʼtââll persoonteâđääd teâttsuõjjvuâkkõõzzi vuâstta.

Pannäʹšš vuäitt miârkkšõõvvâd õuddmiârkkân, što

  • persoonteâđai ǩiõttʼtõõllmõʹšše ij leäkku lääʹjjmeâldlaž vuâđđ leʹbe
  • persoonteâđaid ǩiõttʼtõõlât leigga veiddsanji ǩiõttʼtõõllmõõžž miârktõʹsse veʹrddeeʹl.